Хотын дарга Д.Сумъяабазар ажлаа авснаас хойш хэрэгжүүлсэн Гурван суурьт хөтөлбөр буюу Эрх зүй, Эдийн засаг, Эрүүл засаглалын хөтөлбөр болон цаашид хийж хэрэгжүүлэх ажлын талаар Улаанбаатар хотоос сонгогдсон УИХ-ын гишүүдэд танилцуулж байна. Энэ үеэр түгжрэлийг бууруулахад авах арга хэмжээний талаар ярилаа.
Тэрбээр “Төрийн үйлчилгээ, амралт чөлөөт цагаа өнгөрүүлэх газар, сургуулиудын дийлэнх хувь нь Сүхбаатар дүүрэгт үйл ажиллагаагаа явуулж байна. Гурван эгнээ байгаа замыг сайжруулж, хоёр эгнээтэй зам дээр нэг эгнээ нэмж 13.3 километр замыг 16.4 тэрбум төгрөгөөр холбож өгснөөр зорчих хөдөлгөөн сайжран. Ачаалал нь нэмэгдсэн сургуулиуд замын түгжрэлийн шалтгаан болж байна. Шархад, Улиастай, Сэлбэ зэрэг дэд төвүүд бий. Энэ дэд төвүүдэд суурилсан их, дээд сургуулиудыг гаргах бодлогыг хиймээр байна. Их сургуулиудыг Дархан, Багануур зэрэг хөдөө орон нутагт шилжүүлнэ гэж олон жил ярьсан. Одоо бол Улаанбаатар хотдоо, ШУТИС-ийг Шархад руу, АШУҮИС-ийг Амгалан руу, СУИС-ийг Сэлбэ рүү, Худалдааны сургуулийн Баянхошуу руу, МУБИС-ийг Ханын материал руу зэргээр их, дээд сургуулиудаа хэдэн тийш нь гаргах нь төвийн дүүргийн төвлөрлийг сааруулж, шилжиж очсон газарт нь үйлчилгээний орчин бий болно. Богино хугацаанд хийгдэх шинэчлэлтийн ажил болно” гэв.
