Мягмар, 11 сар 28, 2023
-14.9 C
Ulaanbaatar

П.Сайнзориг: Халимаг, Тува, Буриадын бөхчүүд барилдах хүсэлтийг хангана

Үндэсний их баяр наадмын тухай хуулийн шинэчилсэн найруулгын хуулийн төслийг эцэслэн хэлэлцүүллээ. Хуулийн
төсөлд аймаг сумын наадмыг долдугаар сарын 10-12-нд, Улсын баяр 11-13-ны өдрүүдэд зохион байгуулах, барилдах доод насыг 16 болгож, түргүүлсэн бөхөд цолны батламж олгодгийг болиулж шууд цол олгох, допинг хэрэглэсэн бол улсын цолыг хураахаар, унаач хүүхдийн насыг 7 ба түүнээс дээш гэж байсныг 8 болон түүнээс дээш болгож, Засгийн газрын шийдвэрээр дөрвөн бүсийн морины шигшмэл уралдааныг нэгэн зэрэг зохион байгуулах, допингийн эсрэг дэлхийн дүрмийг бөх, сурын харваач холбогдох холбоод мөрдөх, монгол үүлдрийн адууны стандартыг батлах хүртэл Засгийн газраас баталсан дүрмээр зохицуулах зэрэг 37 зарчмын зөрүүтэй саналыг байнгын хорооноос гаргасан юм.

Энэ үеэр Хууль зүй, дотоод хэргийн яамны Төрийн нарийн бичгийн дарга П.Сайнзориг "Бөхийн хувьд аль болох өргөн дэлгэр тэмдэглэе гэдэг агуулга, зарчмыг баримталж байгаа. Үндэсний уламжлалаас гадна спортын элементүүд орж ирсэн. Дүрэм нь тодорхой байг гээд байгаа юм. Өөр аймаг, сумын бөхийг оролцуулдаггүй, өндөр цолтой бөхчүүд аймаг, сум хэсч явдаг зэргийг зохицуулахыг зорьсон. Тухайн үеийн наадмыг зохион байгуулах комисс нь хийж ирсэн. Цаашдаа хуулиар нутаг усаар ялгаварлан гадуурхахгүй. Үндэсний бөхөд ялгаварлан гадуурхах заалт байх ёсгүй. Аймаг сум, иргэншлээр нь ялгаварлан гадуурхахгүй. Халимаг, Тува, Буриадын бөхчүүд наадамд оролцох хүсэлтээ илэрхийлсэн. Бидний хувьд хорооны хурлаар танилцуулж хүсэлтийг нь хангах чиглэлээр ажиллаж байна" гэсэн юм.

LEAVE A REPLY

Please enter your comment!
Please enter your name here

Шинэ мэдээ